《25歲之後發現自己好易飽》
以前我覺得我擁有一個黑洞胃
可以一直食一直食，食到十分飽先收手
但25歲之後，我發現我成個消化系統起咗莫明嘅變化！
首先，我開始鍾意食以前唔食嘅野。
例如：青瓜、苦瓜、芫茜、黃帝菜等等多種蔬菜！
細個我係揀飲擇食之王，小學連白飯都唔食
去到依家覺得日本米就咁食都好好味⋯
又開始覺得各種各樣嘅蔬菜突然變得好好味！
真係要用「突然」，以前最憎臭茜，
但唔知邊日開始我竟然覺得加咗臭茜好似好味啲⋯
然後我開始食唔到十分飽。
以前真係可以一直食一直食，食到頂住個肚都唔覺辛苦
依家真係唔得，食到八、九成已經覺得頂住頂住
食到十成真係會唔舒服！所以依家無再去食放題自助餐
因為根本食唔到個價錢，仲有種貼錢買難受嘅感覺。
仲有我開始覺得質比量重要太多。
以前咩狗屎垃圾都可以食，公仔麵麥當奴可以做正餐
依家覺得每一餐都好珍貴，有種「食得一餐得一餐」嘅感覺
所以每一餐我都好珍惜，唔一定要食得貴
但真係唔想再將垃圾放入肚度，浪費Quota。
口味都好似慢慢唔一樣，依家食唔到太咸太甜太濃味
飲到太甜嘅野頭會痛，食到太咸嘅野喉嚨會痛
以前食野一定要有汁有多調味先覺得好食
依家食到食物嘅原味反而覺得好味。
而最重要係，我覺得我開始好容易飽。
以前好似有個黑洞胃，食極都唔識飽
然後又好快可以消化完，又餓又再食食食
尤其係呢一兩年，突然發現自己開始快咗好多就識飽
麥仔有時都話：你無理由咁快飽㗎。
但真係，我好似唔係自己咁，開始好快飽。
更恐怖嘅你知唔知係咩？
係我發現我啲朋友都係咁！
以前同班朋友出嚟食飯打邊爐，好似食野比賽咁
大家都可以由頭食到落尾，有時食飽仲可以食多碗糖水
近呢一年同同一班人出去食飯，大家戰鬥力都好弱
食到平時嘅一半已經陸續停手嗌飽⋯
以前我哋成日笑自己一人可以食到一隻牛落肚
但近年大家好似都不復當年勇，食物焚化爐都唔再work！
依家每次好快就飽，我都會感歎：老了。
新陳代謝不如前，消化系統都好似不如前。
噢，中女是這樣練成的。
如果鍾意我嘅文字，請支持我嘅寫作：
https://www.patreon.com/hkgirlfriend
每月$6美金起，助養我嘅freelance創作生涯
（Patreon收入會將一半捐出，支援被捕人士）
IG：@hkgirlfriend
FB：港女友
Search